Ajit Pawar ka Antim Sanskaar Baramati mein — Hazaron ne Di Shraddhanjali
Reported by: Anam Siddiqui
Baramati, Maharashtra:
Maharashtra ke senior neta Ajit Pawar ka antim sanskaar aaj Baramati mein rajkiya samman ke saath sampann hua. Is mauke par hazaron log, parivaar ke sadasyon, rajneetik netaon aur samarthakon ne aakhri darshan karke shraddhanjali arpit ki.
Antim sanskaar ke dauran poora Baramati shok mein dooba hua nazar aaya. NCP, BJP, Shiv Sena samet kai dalon ke bade neta, sarkari adhikari aur samaj ke pramukh log upasthit rahe. Logon ne Ajit Pawar ko “majboot prashasak aur zameen se jude neta” ke roop mein yaad kiya.
Rajya sarkar ki taraf se full state honours diye gaye. Tirange mein lipti deh ko dekhkar logon ki aankhen nam ho gayi. Antim yatra ke dauran “Ajit Dada amar rahein” jaise naare bhi goonjte rahe.
Parivaar ke sadasyon ne bhari mann se antim vidhi poori ki. Netritva aur prashasan mein Ajit Pawar ke yogdan ko yaad karte hue kai netaon ne kaha ki unka jana Maharashtra ki rajneeti ke liye ek bada nuksaan hai.
Ajit Pawar ke nidhan ke baad rajya bhar mein shok ki lehar hai. Baramati, jo unki karmabhoomi rahi, aaj apne neta ko aakhri vidaai dete hue khamosh aur bhavuk nazar aayi.
